06/07/2026

Kronika: 2. jardunaldia uda (uztailak 5)

Donostiako Hipodromoak uda denboraldiko bigarren jardunaldia hartu zuen igande honetan, uztaileko lehenengoa, eta horrekin batera hasiera eman zien Donostiako zaldiketa-egutegiko hilabeterik bizi eta zirraragarrienei. Guztira bost lasterketa jokatu ziren, helmuga estuak, Bugatti bihurgunean borroka ikusgarriak eta giro aparta izan zituen jardunaldi batean. Horrela, denboraldiaren hasiera itxaropentsuak maila handiko ikuskizuna eskainiko duela berretsi zuen.

Inoiz korritu gabeko bi urteko potro eta potrentzat antolatutako hasierako lasterketak ez zuen ezustekorik izan. Estreinaldi ezin hobea egin zuen Narceak, helmugatik 300 metrora erasoa jo eta garaipena inoiz arriskuan ikusi gabe eskuratu baitzu Al Wukair - Yeguadas Valmodomus eta La Faisanera (Finca La Serreta) Saria bereganatzeko. Miguel Alonso Roldán entrenatzaileak aurretik ohartarazia zuen Narceak zein Katxorrok kalitate nahikoa zutela ondo aritzeko. Eta hala izan zen: biek bete zituzten aurreikuspenak, nahiz eta Ribat tartean sartu zen eta bigarren postuan amaitu zuen, garailearekiko gorputz bateko aldearekin.

Eta ohikoa den bezala, ez zen asko itxaron behar izan eguneko lehen ezustekoa iristeko. Bigarren lasterketan Philauren garaipena aurreikusten zen, Donostian azken hiru jardunaldietatik bitan postu onak lortu ostean, hain gertu zirudien garaipenaren bila baitzegoen. Baina irudipen hutsa izan zen, eta errealitatetik urrun, laugarren postuan amaitu zuen, lehian sartzeko aukerarik gabe. Fegentri World Championships Sariaren garailea Mr Alan izan zen, Donostiako Hipodromoan egin zuen debut ezin hobean. Helmugatik 200 metro baino gehiago falta zirenean jada garaipena eskuetan zuen, eta azken metroek bere nagusitasuna areagotzeko baino ez zuten balio izan, bikain kudeatutako lasterketa batean. Sanber eta Istanbul izan ziren podiuma osatu zutenak.

Uda denboraldiko bigarren jardunaldi honen erdian jokatu zen Belle Époque (1916) - Kresala Saria. Liberty Bleu izan zen pronostikoak bete eta Madrilgo La Zarzuela hipodromoan sortutako zalantzak atzean uzteko gai izan zen behorra. Helmugatik 200 metrora egindako erremate indartsu batekin, aurkariak atzean utzi eta garaipen argia lortu zuen. Sashay Away eta Volkonshka bigarren eta hirugarren sailkatu ziren, hurrenez hurren, Christian Delcherrek entrenatutako behorra gainditzeko aukerarik izan gabe.

Azken probaren aurretik, Haras de Luján - Jose Luis Cano Saria jokatu zen, 1.400 metroko distantzian. Araka la Kana edo Haya Taal bezalako faborito nabarmenak lehian zirela, laugarren lasterketa honek jardunaldiko helmugarik estuena, hainbat ezusteko eta Bugatti bihurgunean borroka ikusgarriak utzi zituen. Something eta Haya Taal izan ziren lehenengoak buruan jartzen, baina guztia benetako bataila bihurtu zen helmugara hurbiltzean. 150 metro falta ziren eta hiru zaldi zihoazen parean garaipenaren bila: Something, Beria eta Half Moon Rising. Azkenean, azken honek eman zuen ezustekoa eta garaipena bereganatu zuen, amaiera zirraragarri baten ostean. Beria garaipenaren atarian geratu zen, eta Somethingek podiuma osatu zuen.

Azkenik, Donostia San Sebastián Turismoa Saria izan zen uda denboraldiko bigarren jardunaldiari amaiera bikaina emateko arduraduna. Port Gallanden baja dela eta, azkenean 13 partaidek hartu zuten parte 1.400 metroko lasterketan, eta Katalina izan zen garailea. Horrela, Donostiako Hipodromoan duen bolada bikaina luzatu zuen: azken lau jardunaldietan bi garaipen eta bi bigarren postu lortu ditu. Helmugatik 100 metrora egindako azken erasoa erabakigarria izan zen bere aurkari nagusia, Dance Ahead, mendean hartzeko. Días Felices eta Sir Geoff Morgan izan ziren helmugara iritsi ziren hurrengoak.

Uda denboraldia hasi besterik ez da egin, eta bigarren jardunaldi honen ondoren bete-betean sartuko gara Donostiako zaldiketa-egutegiko hilabeterik esperoenetan. Datorren uztailaren 12an, igandean, berriro ere zain izango gaituzue hipodromoan, emozioz beteriko uda batez gozatzen jarraitzeko. Uztaila, abuztua eta iraila zehar luzatuko den jardunaldi-ziklo bizi bati ekingo diogu. Hau hasi besterik ez da egin!

06/07/2026